"Өмүрбек Текебаевдин ден соолугу текшерилип жатат, анализдери чыга элек" дейт анын жактоочусу

Жогорку Кеңештин мурдагы депутаты Өмүрбек Текебаевдин ден соолугу учурда текшерилип жатат, анализдери чыга элек. Бул тууралуу бүгүн, 7-августта SUPER.KG порталына анын жактоочусу Таалайгүл Токтакунова билдирди.

Анын айтымында, Текебаевдин ооруканадан качан чыга турганы азырынча белгисиз.

Өмүрбек Текебаев медициналык кароодон өтүү үчүн Улуттук кардиология борборуна чыгарылганы маалымдалган.

Эске салсак, былтыр жаз мезгилинде Өмүрбек Текебаев менен мурунку элчи Дүйшөнкул Чотоновго "Мегакомду" сатууга көмөктөшүү үчүн орусиялык ишкерден пара алган" деген жүйө менен кылмыш иши козголгон. 2017-жылы 16-августта Бишкек шаарынын Биринчи Май райондук соту Текебаев менен Чотоновду ар бирин 8 жылга эркинен ажыраткан. 2-октябрда Бишкек шаардык соту, 21-ноябрда Жогорку Сот райондук соттун өкүмүн күчүндө калтырган.