III Дүйнөлүк көчмөндөр оюндарына Маданият министрлиги тарабынан 175 миллион сом бөлүндү

III Дүйнөлүк көчмөндөр оюндарын уюштуруу үчүн Маданият министрлиги тарабынан 175 миллион сом бөлүндү. Бул тууралуу бүгүн, 7-августта атайын жыйын учурунда маданият, маалымат жана туризм министринин орун басары Айнура Темирбекова билдирди.

"Көчмөндөр оюндарын каржылоонун негизги бөлүгүн демөөрчүлөрдүн каражаты түзөрү күтүлүүдө. Ал эми биздин министрлик 175 миллион сом бөлдү. Анын 125 миллион сому оюндун ачылуу жана жабылуу аземдерине жумшалат. Калган 50 миллион сом Кырчын жайлоосунда өткөрүлө турган иш-чараларга, ата мекендик жана чет элдик журналисттердин чыгымдарына, ошондой эле этнофестивалды уюштуруу үчүн жумшалат. Этнофестиваль коноктор кыргыз маданияты, салт-санаасы менен таанышып, өздөрүнүн да улуттук өзгөчөлүктөрүн көрсөтүшсүн деген максатта бул жылы биринчи ирет өткөрүлүп жатат", - деп билдирди министрдин орун басары.

Эске салсак, III Дүйнөлүк көчмөндөр оюндары 2-8-сентябрь аралыгында Ысык-Көлдө өтөт.