Камактагы саясатчы Өмүрбек Текебаевдин диагнозу белгилүү болду

Улуттук кардиология борборунда дарыланып жаткан Өмүрбек Текебаевдин диагнозу белгилүү болду. Жазаларды аткаруу мамлекеттик кызматынын басма сөз катчысы Элеонора Сабатарованын SUPER.KGʹге билдиришинче, камактагы саясатчынын анализдери чыгып, анын бир катар оорулар менен жабыркаганы белгилүү болгон.

"Соттолуучу жүрөк тамырларынын атеросклерозу, күрөө тамырдын, карындын үстүндөгү экстрасистоликалык аритмия, 2-даражадагы кооптуулугу жогору болгон гипертония, богок, эутиреоз оорулары менен жабыркайт экен. Азыр ал күзөтчүлөрдүн кайтаруусунда Улуттук кардиология борборунда дарыланууда, ооруканадан качан чыгары азырынча белгисиз", - деди Сабатарова.

Буга чейин Өмүрбек Текебаев медициналык кароодон өтүү үчүн Улуттук кардиология борборуна чыгарылганы маалымдалган.

Былтыр жаз мезгилинде Өмүрбек Текебаев менен мурунку элчи Дүйшөнкул Чотоновго "Мегакомду" сатууга көмөктөшүү үчүн орусиялык ишкерден пара алган" деген жүйө менен кылмыш иши козголгон. 2017-жылы 16-августта Бишкек шаарынын Биринчи Май райондук соту Текебаев менен Чотоновду ар бирин 8 жылга эркинен ажыраткан. 2-октябрда Бишкек шаардык соту, 21-ноябрда Жогорку Сот райондук соттун өкүмүн күчүндө калтырган.