Оңдоп-түзөө иштерине байланыштуу Бишкектеги Чыңгыз Айтматов кең көчөсүнүн бир бөлүгү жабылат

Оңдоп-түзөө иштерине байланыштуу 8-августтан 28-августка чейин Бишкектеги Чыңгыз Айтматов кең көчөсүнүн И.Ахунбаев көчөсүнөн М.Горький көчөсүнө чейинки бөлүгү убактылуу жабылат. Бул тууралуу Бишкек шаардык мэриясынын маалымат кызматы билдирди.

Оңдоп-түзөө иштери "Бишкек шаарынын унаа жолдорунун жол катмарын калыбына келтирүү" долбоорунун алкагында ѳткѳрүлүп, жол катмары алмаштырылат жана бордюрлар орнотулат.

Айтматов кең көчөсүн айланып өтүү батыш тараптан Бакаев жана Жунусалиев көчөлөрү, чыгыш тараптан Токтоналиев көчөсү аркылуу жүргүзүлөт.

11-12-августта Ахунбаев көчөсү менен Айтматов кең көчөсүнүн кесилишиндеги жолду оңдоо иштери жүргүзүлүп, калган күндөрү аталган кең көчө менен Айни, Жаманбаев, Ахунбаев, жана Горький көчөлөрүнүн кесилиштери унаа кыймылы үчүн ачык болот.