Белгилүү "Такси" тасмасынын жылдызы Москвада сабалды

Белгилүү "Такси" тасмасынын жылдызы Сами Насери Москва шаарында сабалганын орусиялык ЖМКлар жазууда. Андагы маалыматтарга таянсак, француз актёру Сами Насер шаардагы түнкү клубдардын биринде 6-августка караган түнү сабалган. Бул окуядан соң Насер ооруканага кайрылып дарыгерлердин көзөмөлүнөн өткөн.

Иликтөө иштеринин натыйжасында Орусия полициясы тарабынан Сами Насерини сабаган делип клубдун кардары кармалган.

Кармалган кардардын айтымында, Насери достору жана агасы менен клубда эс алып жаткан. Актёр мас абалда болгондуктан кызматкерлерге орой мамиле кылып, эсепти төлөөдөн баш тарткан.

"Анын официант кыздарга жана администраторго кылган мамилесин көрүп кийлигишүүнү туура көрдүм. Алгач мен аны четке түрттүм. Бул учурда ал мени дароо муштуму менен уруп жиберди. Ошондон улам мушташ чыгып кетти. Ал өзү дагы, жанындагы достору дагы мас абалында болчу", - деп билдирген кармалган кардар.

Актёр мушташтан кийинки сүрөтүн өзүнүн социалдык тармактагы баракчасына жарыялаган.