Роза Аманова ректор болуп дайындалган медициналык окуу жайдын мурунку жетекчиси пикирин айтты

Кыргыз Эл артисти Роза Аманованын медициналык окуу жайга ректор болуп дайындалышы боюнча аталган окуу жайдын мурдагы жетекчиси Жаркынбек Касымбеков SUPER.KG`ге өз пикирин билдирди.

"Акыркы учурда социалдык тармактарда Роза Аманованын жаңы кызмат орду боюнча ар кандай пикирлер айтылууда. Көпчүлүк атайын билими жок адамдын медициналык окуу жайга жетекчи болуп дайындалуусун сынга алышууда. Буга байланыштуу өз пикиримди билдирип коюуну туура көрдүм.

Биринчиден, Билим берүү жана илим министрлигинен айтышкандай бул окуу жай жеке менчик болгондугуна байланыштуу кимди ректорлукка дайындоону негиздөөчүлөр өздөрү чечет. Экинчиден, Роза Аманова бул окуу жай үчүн бөтөн киши эмес. Мен ректор болуп турган кезде ал киши кадрлар жана уюштуруу маселелери боюнча биринчи проректорлук кызматты аркалап келген. Роза Аманованы мен өз ишин мыкты аткарган менеджер, тажрыйбасы мол, окуу процессин жакшы билген лидер катары билем. Андыктан ал кишинин ректор болуп дайындалышына медициналык билиминин жок экени тоскоол болбойт деп ойлойм. Ректор көбүнчө уюштуруу, каржы маселелерин чечет, бул жагынан Роза Аманованын жетекчи болушу эффективдүү болду деп эсептейм.

Ал эми өзүм жөнүндө айтсам, аталган медициналык окуу жайга караштуу клиника ачылып, университетке клиникалык база түзүү үчүн ал жакка башкы дарыгер болуп которулдум", - деди Касымбеков өз сөзүндө.

Белгилей кетсек, ырчы Роза Аманованын Эл аралык медицина университетине ректор болуп дайындалгандыгы тууралуу маалымат социалдык тармактарда кызуу талкууга алынган. Көпчүлүк "Ырчы дарыгерлерди даярдаса, анда кыргыз медицинасынын келечеги кандай болот?" деген комментарийлерди калтырышкан. Бул тууралуу Роза Амановага байланышып, өз пикирин угуу мүмкүн болгон жок.