Койдун башын куйкалап жатканда паяльник атылып, денесинин 85 пайызы күйүп калган Исфандияр Бабашов каза болуп калды

Койдун башын куйкалап жатканда паяльник атылып, денесинин 85 пайызы күйүп калган Исфандияр Бабашов каза болуп калды. Бул тууралуу маркумдун жакындары SUPER.KG порталына билдирип, Исфандияр Бабашовдун айыгып кетүүсүнө жардам көрсөткөн бардык жарандарга ыраазычылык айтты.

Маркумдун жакындарынын айтымында, Бабашов 14-июлда көз жумуп, 15-июлда жерге берилген.

"Исфандиярга 1-операция жасалгандан кийин эсине келип, сүйлөп жаткан. Бирок 2 күндөн кийин каза болуп калды. Дарыгерлер да, боорукер адамдар да колунан келген жардамын көрсөтүштү. Бирок денесинин көп бөлүгү терең күйгөн эле. Ысыгы ичине түшүп кетти окшойт, бул азаптуу ооруну көтөрө албады", - деди маркумдун жакыны.

Айта кетсек, кырсык ушул жылдын 21-май күнү болгон. Анда Исфандияр Бабашов паяльник менен койдун башын куйкалап жатканда, ал жарылып кеткен. Андан соң жабыркаган адам Жети-Өгүз райондук ооруканасына андан кийин Бишкек шаарындагы 4-оорукананын күйүк бөлүмүнө жеткирилген.

Исфандияр Бабашовдун артында жубайы жана 3 баласы калды.

SUPER.KG порталы Бабашовдун каза болгонуна байланыштуу анын жакындарына терең кайгыруу менен көңүл айтат.