Президент Сооронбай Жээнбеков жол коопсуздугун камсыздаган органды реформалоо максатында жумушчу топ түзөт

Президенттин алдында ички иштер органдарынын жол коопсуздугун камсыздаган бөлүктөрүн реформалоо боюнча жумушчу топ түзүлөт. Аталган демилге бүгүн, 10-августта өлкө башчысы Сооронбай Жээнбеков менен саясий-укуктук иликтөөлөр борборунун директору Тамерлан Ибраимовдун жолугушуусу учурунда айтылганын президенттик аппараттан билдиришти.

Жолугушууга президенттик аппараттын биринчи орун басары Досалы Эсеналиев жана Коопсуздук кеңешинин катчысы Дамир Сагынбаев катышты.

Анда жол коопсуздугун камсыздаган ички иштер органдарынын бөлүктөрүн реформалоо маселелери талкууланган.

"Мыйзам жана тартипти күчөтүү, жарандардын коопсуздугун коргоо максатында жумушчу топ түзүү чечими кабыл алынып, аны жетектөө Тамерлан Ибраимовго сунушталды. Жумушчу топтун курамына президенттик аппараттын, өкмөттүн, Коопсуздук кеңешинин катчылыгынын жана бейөкмөт уюмдардын өкүлдөрү кирет", - деп айтылат маалыматта.

Президент Сооронбай Жээнбеков өз сөзүндө сот реформасы, коопсуздукту, мыйзамды жана тартипти камсыздоо мамлекет алдында турган эң маанилүү маселелердин бири экендигин белгилеген.

"Бул тармактагы реформалар — татаал маселе жана бир топ күчтү жана убакытты талап кылат. Бирок биз реформаларды аягына чыгарышыбыз керек. Мен сиздин жазып берген маалыматыңыз менен таанышып чыктым, анда ишке ашыра турган конструктивдүү идеялар жана ойлор бар. Бизди биргелешкен, талыкпаган жумуш күтүп жатат", - деп өлкө башчысы Тамерлан Ибраимовго кайрылган.

2018-жылдын 19-июлунда президент Сооронбай Жээнбековдун өлкөнүн жарандык коому менен болгон жолугушуусунда Тамерлан Ибраимов жол кыймылынын коопсуздугун реформалоо маселелерин көтөргөн. Анда президент бул маселе боюнча жумушчу топту түзүү максатында ага аналитикалык маалымат даярдоону сунуштаган.