Москвада 70 жаштагы Абдырашит Токтогулов бир аптадан бери дайынсыз болууда

Москва шаарына Жалал-Абаддын Сузак районунан келген Абдырашит Токтогулов дайынсыз болууда. Бул тууралуу анын жээни Бакытбек Буудайчиев бүгүн, 12-августта SUPER.KG порталына маалымдады.

Маалыматка караганда, 70 жаштагы Абдырашит Токтогулов Москвага балдарына, эс алуу үчүн барган.

"Таякебиз Щёлковская метросуна жакын жердеги үйлөрдүн биринде балдарынын үйүндө жашап жаткан. 7-августта кечке маал короого чыгып эс алып келейин деп кеткен бойдон кайтып келген эмес. Психикалык жактан жабыркайт, ошол күнү таппай калганда эле полицияга кабарлап, издөө башталды. Ушуга чейин көп жерден издедик, өлүкканаларды да карадык", - деди Буудайчиев.

Ал белгилегендей, учурда дайынсыз болуп жаткан адамдын туугандары күн-түнүн уйкусуз өткөрүп жаткан учур.

"Коомчулукка кайрылууга аргасыз болдук. Таякем Москвага аялы менен келген. Шаарды билбейт", - деди ал.

Билдирүүгө караганда, Абдырашит Токтогулов ошол күнү сыртка үйгө кийген бут кийим менен чыккан. Үстүндө күрөң-боз түстөгү свитер, көк түстөгү шым кийип жүргөн. Жанында документтери жок. Сүрөттөгү адамды көргөн-билгендер болсо +7916 910-48-72, +996 704 556 628, +7968 631-70-80 номерлерине кабарлап коюуну өтүнөт Буудайчиев.