"Дүйнөнүн сулуу айымы-2018" наамынын ээси Сания Шакированын өмүрүн алган жол кырсыгына шектүү мурда соттолгону айтылды

"Дүйнөнүн сулуу айымы-2018" наамынын ээси Сания Шакирова кырсыкка кабылган унаанын айдоочусу буга чейин соттолгон. Бул тууралуу маркумдун апасы Насипа Мамбеталиева 13-августта өткөргөн маалымат жыйынында билдирди.

"Сот шектүүнү балдары жаш деген шылтоо менен үй камагына чыгарып койду. Бирок Саниянын да кичинекей үч баласы бар. Эмнеге бир тараптуу карап жатышат? Шектүү жаран окуя болгон күнү мас абалында болгон жана унааны катуу ылдамдыкта айдаган. Ал кырсык болгон жерден кызым менен жанындагы досун таштап салып, Бишкектеги №4-ооруканага келип жатып алган. Ошондой эле ооруканага кырсыктап келгенин айткан эмес. Оюнда ал бул окуядан кургак чыгам деп ойлогондур. Ушунун баары тергөө ишинде каралдыбы билбейм. Андан сырткары айдоочу 2016-жылы дагы бейбаштык боюнча соттолгон экен. Бирок мындай маалыматты биз кечээ жакында билдик. Булар боюнча башында айтылган эмес. 15-августта Ысык-Көл райондук сотунда биринчи соттук отурум болот. Соттон акыйкат чечим күтүп жатам", - деди Мамбеталиева.

Ал эми жактоочусу Рустам Абдурауфов бул окуяда бир канча фактылар жашырылып жатканын кошумчалады.

Эске салсак, 2-июнда саат 21:30дар чамасында Балыкчы-Ананьево-Каракол жолунда Кыргыз өлкөсүнөн чыккан "Дүйнөнүн сулуу айымы-2018" наамынын ээси Сания Шакирова жол кырсыгына кабылып каза болгон. Унаа Чок-Тал айылынын кире беришиндеги мүрзөнү курчаган дубалды сүзүп алган. Окуя болгон жерден 31 жаштагы жүргүнчү алган жаракатынан улам Чолпон-Атадагы ооруканага жеткирилген. Ал эми айдоочу туугандары тарабынан Бишкек шаардык №4-ооруканага жеткирилген. Ал эми маркум Сания Шакированын сөөгү 4-июнь күнү Кара-Балта шаарында жерге берилген.