Депутат Алтынбек Сулайманов 2040-жылга карата өнүгүүнүн Улуттук стратегиясында тышкы карыздан кутулуу жолу айтылбаганына нааразы болду

Жогорку Кеңештин "Бир бол" фракциясынын лидери Алтынбек Сулайманов Улуттук кеңештин жыйынында "Өткөн стратегиялык программанын 17 пайызы гана ишке ашыптыр. Биз реалдуу карашыбыз керек" деди.

Ал Улуттук стратегиябыз реалдуу пландар менен жазылышы керектигин баса белгиледи.

"Бул Улуттук стратегияда тышкы карызыбыз, эл аралык мамиле, анын ичинде АКШнын Орусияга карата санкциясы жөнүндө пландар айтылган жок. Бирок булар бизге чоң таасирин тийгизет. Биздин билим берүүбүз артта калган. Айткандын сөзү жаман, ыйлагандын көзү жаман болуп, баары жакшы деп келе берсек, туура эмес. Реалдуу стратегияны түзүү керек. "Кантип ишке ашырабыз" деген суроого жооп таап, анан гана бекитишибиз керек", - деди Сулайманов.

Учурда Бишкекте өлкөнү туруктуу өнүктүрүү боюнча Улуттук кеңештин VII жыйыны өтүүдө. Анда 2040-жылга карата Улуттук стратегиянын жана 2020-жылга карата шайлоо системин өнүктүрүүнүн долбоорлору кабыл алынмакчы. Аталган жыйынга президент Сооронбай Жээнбеков биринчи жолу төрагалык кылууда.