Жактоочу Шарабидин Токтосунов Садыр Жапаровдун ишин караган соттордун үстүнөн Тартип комиссиясына арыз жазды

Абакта отурган саясатчы Садыр Жапаровдун жактоочусу Шарабидин Токтосунов анын ишин караган соттордун үстүнөн Тартип комиссиясына арыз жазды. Жактоочунун SUPER.KG'ге кабарлашынча, Жогорку Соттун судьялары Жапаровду камакта калтыруу боюнча соттун чечимин өз учурунда беришкен эмес.

“Садыр Жапаровдун ишин караган Жогорку Соттун судьялары Кеңешбек Токтомамбетовдун, Бусурманкул Бактыгуловдун жана Нургүл Бакированын үстүнөн Тартип комиссиясына арыз жазгам. Алар мыйзамды көз көрүнөө бузду. Садыр Жапаров боюнча чыккан соттук токтомду мага дароо бериш керек эле, мүмкүнчүлүк жок болсо, 10 күндүн ичинде бериш керек. Мага токтом 16 күндүн ичинде берилди. Өз мөөнөтүндө берилбеген учурда токтомдун юридикалык күчү да жоголот. Алар мыйзамды тебелеп жатышат. Андан сырткары Жапаровдун ишиндеги жаңы жагдайлар пайда болду. Жакында Башкы прокуратурага кайрылганы жатабыз”, - деди Токтосунов.

Эске салсак, Садыр Жапаров 2013-жылы 7-октябрда Каракол шаарында "Кумтөр" боюнча нааразычылык акциясындагы баш аламандыкты уюштурууга күнөөлөнүп, 2017-жылдын 25-мартында Кыргыз-Казак чек арасынан кармалып, камакка алынган.

2017-жылдын 2-августунда Жапаров Биринчи Май райондук сотунун өкүмү менен "барымтага алуу" беренеси боюнча күнөөлүү деп табылып, 11 жыл 6 айга эркинен ажыратылган. Райондук соттун чечимин Бишкек шаардык соту, андан кийин Жогорку Сот күчүндө калтырган.