Өлкөгө мыйзамсыз жол менен алынып келген оор жүк ташуучу унаа кармалды

Өлкөгө мыйзамсыз жол менен алынып келген оор жүк ташуучу Вольво ФН12420 үлгүсүндөгү унаа кармалды. Бул тууралуу 13-августта SUPER.KGʹге Экономикалык кылмыштарга каршы күрөшүү боюнча мамлекеттик кызматынан (Каржы полициясы) кабарлашты.

Мекеменин маалыматына караганда, кармалган унаа чет өлкөдөн Кыргыз мамлекетинин аймагына 2017-жылы алынып келип, жасалма документтер менен каттоого алынган.

“Кымбат баалуу унааларды ташып кирүү боюнча аныкталган коррупциялык схеманын алкагында тергелип жаткан кылмыш иши боюнча ыкчам изилдөө иш-чаралары жүргүзүлгөн. 11-августта “Кемин” салмак көлөмдүк көзөмөл пунктуна жакын жерден 2003-жылы чыгарылган Шмитц үлгүсүндөгү чиркегичи бар Вольво ФН12420 үлгүсүндөгү автоунааны табышкан.

Аталган унаа өлкө аймагына 2017-жылы алынып келгени жана мамлекеттик бюджетке тийиштүү бажы төлөмдөрү төлөнбөнү белгилүү болгон. Унаа жасалма документтер менен Кара-Көл шаары боюнча Транспорт каражаттарын жана айдоочулук курамды каттоо департаментинде катталганы аныкталды. Мунун натыйжасында мамлекеттик бюджетке 1 миллион сомдон ашык зыян келген, - деп билдиришти мекеменин маалымат кызматынан.

Учурда өлкөнүн бардык аймактарында ушундай фактыларды аныктоого багытталган текшерүү иш-чаралары жүргүзүлүп жатканы айтылды.

Буга чейин ИИМ ЕАЭБге кирген өлкөлөрдөн уурдалган 45тен ашык унаа Кыргыз мамлекетинен табылганын кабарлаган. Анда уурдалган унаалардын ичинде Лексус, Тойота, Мерседес-Бенц үлгүсүндөгү жол тандабастар бар экендиги жана 82 пайызынын VIN-сыр белгиси өзгөртүлгөнү айтылган. Ошондой эле унааларды уурдоо менен алектенген Орусия жана Кыргыз мамлекетинин жарандарынан турган кылмыштуу топ бар экендиги кошумчаланган.