Таш-Көмүр шаарында оор кылмышка шектүү жаран кармалды

Жалал-Абад облусундагы Таш-Көмүр шаарында оор кылмышка шектүү жаран кармалды. ИИМдин басма сөз кызматы билдиргендей, 28-июнда милиция бөлүмүнө шаардын көчөсүндө бир кишини өлтүрүп кетишкендиги тууралуу маалымат келип түшкөн. Окуя болгон жерге келген милиция кызматкерлери 37 жаштагы Р.Анын жансыз денесин табышкан. Бул айым көкүрөгүнө жана башына 5 жолу сайылган бычактан улам каза болгон. Ыкчам иликтөөлөрдүн натыйжасында кылмышка шектүү катары маркумдун 6 жыл мурун каза болгон күйөөсүнүн иниси, 1982-жылы туулган К.З. кармалган. Иликтөөнүн жүрүшүндө белгилүү болгондой, маркум Орусияда иштеп жүрүп, балдарын көргөнү аталган шаарга келген. Алдын ала алынган маалыматтар боюнча кылмышка шектүү кызганычтын айынан Р.Аны бычактап салган. Маркумдун аркасында 4 баласы жетим калган. Ал эми милиция кызматкерлери “адам өлтүрүү” беренеси боюнча кылмыш ишин козгоп, кылмышка шектүүнү убактылуу кармоочу жайга камашкан. Учурда тергөө иштери жүрүп жатат.