"Атлетико Мадрид" футболдук клубу "Реалды" жеңип УЕФАнын Суперкубогун утуп алды

16-августка караган түнү Эстониянын Таллин шаарында футбол боюнча УЕФАнын Суперкубогу орун алды. Анда "А Ле Кок Арена" стадионунда Чемпиондор Лигасынын жеңүүчүсү "Реал Мадрид" жана Европа Лигасынын жеңүүчүсү "Атлетико Мадрид" командалары кез келишти.

Беттештин алгачкы мүнөтүндө эле "Атлетиконун" футболчулары эсеп санын ачканга жетишти. Анда Диего Коста коргоочулар Рафаэль Варан менен Серхио Рамосту алдап өтүп таамай соккусу менен Кейлор Наваска тосуп алууга мүмкүнчүлүк берген жок. "Реалдын" оюнчулары 27-мүнөттө гана жооп бере алды. Анда Гарет Бэйл сол канаттан айып аянтчага көтөрүп, аны Бензема башы менен дарбазага багыттап, эсеп санын тең кылды. 63-мүнөттө "Атлетиконун" коргоочулары ката кетирип, "Реалга" пенальти тебүүгө мүмкүнчүлүк берди. Аны "Реалдын" капитаны Серхио Рамос ийгиликтүү аткарып, эсепти 2:1 кылды. 79-мүнөттө Диего Коста кайрадан айырмаланып эсепти теңеди. Муну менен беттештин негизги убактысы бүтүп, командалар кошумча 2 тайм ойношту. Анын жүрүшүндө алгач Сауль Ньигес айырмаланса, 105-мүнөттө Коке гол киргизгенге үлгүрдү.

Муну менен "Атлетико Мадрид" командасы 2:4 эсеби менен жеңишке ээ болуп, УЕФАнын Суперкубогун утуп алды.