ЭЛДИК КАБАР: Окурман: "Пенсияга чыгуудагы документтерди ырастоодо систем өзгөрбөсө, ортодон акча өөнөп калгандар токтобойт"

Жалал-Абад облусуна караштуу Сузак районунун Н.Жумаева аттуу тургуну "Элдик кабарга" кайрылып кабылган көйгөйү тууралуу айтып берди. Жумаеванын билдиргенине ылайык, анын 70 жаштагы кайнатасы аялын пенсияга чыгарууга документ даярдап жатат.

"15-август күнү кайненемдин документтерин тактаганы Сузак районунун Жерди каттоо бөлүмүнө барса анда иштеген кызматкер 170 сом банкка төлөп кел дептир. Ага макул болуп эле төлөп келген.

Келгенден кийин эми мага 580 сом бересиз, болбосо документтериңизди даярдабайм дептир. Кайнатам акчам жок десе документтерин ыргытып, орой мамиле жасаганда ал мага чалды.

Мен барып "580 сом эмне үчүн алынарын түшүндүрүп бериңиз, анткени бул колго берилип жатат?" десем мага да жооп берген жок. Ал кызматкерден "Мамлекеттик каттоо кызматы өзүн өзү каржылайт, мамлекеттин бир тыйын пайдасы жок, каалаган жагыңарга барып арыздангыла, коркпойм" деген жоопту уктук.

Бизде бардык документтер туура толтурулган, кемчилик жок болчу. Болгону 1996-жылы бөлүнгөн жер үлүштү 1999-жылы бөлүнгөн деп өздөрү туура эмес жазып коюшкан. Кайра ошону оңдоого акча сурап жатканын кийин түшүндүк.

Менин айтарым, улгайган адамдар пенсияга чыгууда документ даярдап жатып кээ бир жагдайларды түшүнбөй, улам бир мекемеден экинчисине чуркай албай көп эле кызматкерлерден кагуу, жеме жейт. Бирок чыдашат. Менимче, документ даярдоонун системин өзгөртпөсө ортодон акча өөнөгөндөр токтобойт", - деди ал.