Өзбекстандын эрежесиз уруш боюнча чемпиону Жамшид Кенжаевди бычактаган түнкү клубдун күзөтчүлөрү 15 күнгө абак жазасына тартылды

Өзбекстандын эрежесиз уруш боюнча чемпиону Жамшид Кенжаевди бычактаган түнкү клубдун күзөтчүлөрүнө административдик айып тагылып, 15 күнгө камалат. Бул тууралуу өзбек басылмалары жазып чыгышты.

"Түнкү клубдун 3 кызматкерине "өз ыйгарым укуктарын ашыкча колдонгон" деген айып тагылып, 15 күнгө камакка алынып, 23 доллар өлчөмүндөгү айып пул салуу тууралуу өкүм чыкты. Мындай чечимди Ташкент шаардык соту чыгарды. Азыркы учурда айыпталуучулардын бири абакта болсо, калган экөө ооруканада дарыланып жатат", - деп айтылат маалыматта.

Эскерте кетсек, интернетке Өзбекстандын эрежесиз уруш боюнча чемпиону Жамшид Кенжаевдин бычакталган окуясы тартылган видео тараган. Окуя Өзбекстандын Ташкент шаарындагы түнкү клубдардын биринде 9-августка караган түнү болгон. Жергиликтүү ЖМКлардын өлкөнүн Башкы прокуратурасынын маалыматына таянып жазганына караганда, 25 жаштагы чемпион клубга ашкана бычагы менен кирүүгө аракет кылганда клубдун күзөтчүлөрү менен чырдаша кеткен. Жыйынтыгында ортодо уруш чыгып, чемпиондун көкүрөк тушуна бычак сайылган. Ал дароо ооруканага жеткирилип, бирок алган жаракатынан улам каза болгон.