Өзүн милиция кызматкери катары тааныштырып, алдамчылык менен алектенүүгө шектелген адам кармалды

өзүн милиция кызматкери катары тааныштырып, алдамчылык менен алектенүүгө шектелген адам кармалды. Бул тууралуу ИИМдин маалымат кызматынан 18-августта кабарлашты. Маалым болгондой, министрликтин Криминалдык милиция кызматына 29 жаштагы жаран арыз менен кайрылып, Жаныбек аттуу чала таанышына чара көрүүнү суранган. Жазган арызында ал алдоо жолу менен ири суммадагы акча каражатын алып, качып кеткендигин билдирген.
"Ал өзүн милиция кызматкери катары тааныштырып, көйгөйүн чечип берем деп жабырлануучунун ишенимине кирген. Өз жардамын берүү үчүн 1 миң долларын алып, кийин изин жашырып качып кеткен.
Жогорудагы факты боюнча ушул жылдын август айында Бишкек ШИИББинин тергөө кызматы тарабынан кылмыш иши козголгон. Ошондой эле Бишкек шаарынын жана Чүй облусунун аймагында алдамчылык менен алектенип жүргөндүгү да маалым болгон. Тергөөнүн жүрүшүндө жогорудагы кылмыш ишине шектүү катары 1989-жылы туулган Жаныбек Кенжекараев аттуу адам кармалган. Кармалган жаран Талас облусунун тургуну болуп, Бишкек шаарында убактылуу жашап жүргөн. Ошондой эле,кармалган жаран ички иштер органдарына эч кандай тиешеси жок", - деп билдиришти ИИМден.
Азыркы учурда кармалган жарандын ушул сыяктуу башка дагы кылмыш ишине тиешеси бар экени иликтенип жатат. Министрлик жогорудагы жарандан жабыркагандар жана ал боюнча маалыматтарды билгендер болсо, 0 (312) 26 63 21, 0 (555) 36 50 01, 0 (701) 75 85 75 номурлары аркылуу байланышууңарды суранат.