Кайыңды шаарынын 27 жаштагы тургуну милицияга зордуктоо боюнча арыз жазды

Жигитинин досу тарабынан зордукталып, сабалганын айткан Кайыңды шаарынын 27 жаштагы тургуну милицияга зордуктоо боюнча арыз жазды. Бул тууралуу SUPER.KG'ге жабырлануучу кыз өзү кабарлады. Анын айтымында, Панфилов РИИБинин ыкчам-тергөө бөлүмүнүн кызматкерлери окуя болгон Чалдыбар айылына барып, тийиштүү документтерди чогултуп, зордуктоо боюнча арыз алып кетишти.

"Азыр мен экспертизадан өтүп келип, ооруканада жатам. Милиция кызматкерлери окуя болгон үйгө барып, далилдерди чогултуп, менден зордуктоо боюнча арыз алып кетишти. Буга чейин сабалганым боюнча арыз бергем", - деди жабырлануучу кыз.

Кайыңды шаарынын 27 жаштагы тургуну 17-август күнү Панфилов районунун Чалдыбар айылында өзүнүн сүйлөшүп жүргөн жигитинин досу тарабынан зордукталып, андан кийин сабалганын айтып берген.

Ал эми экинчи тараптын өзү менен байланышууга азырынча мүмкүн боло элек. Кыздын жигити болгон адамдын таанышымын деп өз оюн айткан жарандын билдиришинче, жабырлануучунун айткан сөздөрү калп болушу мүмкүн. "Кыздын жүрүм-туруму начар болчу. Ал жалаа жаап жатат окшойт. Бул жерде кыз зордуктап, сабады делип жаткан баланын капчыгын уурдап алганын, уруш ошондон чыккан уктум. Бирок биз дагы жакшы чын-төгүнүн билбей жатабыз", - деди ал.

Чүй ОИИББинин маалымат кызматынын башчысы Назира Имангазиеванын айтымында, учурда облустук милициянын ыкчам-тергөө тобу тарабынан жазылган арыздардын негизинде териштирүү иштери жүрүп жатат. "18-августта аймактык милицияга Чалдыбар айылынын 1981-жылы туулган жаранынан жана Кайыңды шаарынын 1991-жылы туулган жаранынан арыз келип түшкөн. Чалдыбар айылынын тургуну өзүнүн жазган арызында 1991-жылы туулган кыз унааны, гитараны жана телевизорду талкалап чоң чыгымга учуратканын көрсөткөн. Экинчи тарап 1981-жылы туулган киши тарабынан сабалганын айтып даттанган. Окуя облустук милициянын жетекчисинин көзөмөлүнө алынып, ыкчам-тергөө тобу иш алып барып жатат", - деди Имангазиева.