Бүгүн "Коопсуз шаар" долбоорун ишке ашыруучу компания аныкталат

Бүгүн "Коопсуз шаар" долбоорун ишке ашыруучу компания аныкталат. Бул тууралуу SUPER.KG порталына Маалыматтык технологиялар жана байланыш мамлекеттик комитетинин төрагасынын орун басары Эшмамбет Аматов билдирди.

Аматовдун айтымында, тендерден уткан компанияны тандоо бүгүн саат 15:00дө башталат. Тандоо ачык-айкын болушу үчүн онлайн-режимде чагылдырылат жана тандоону өткөрүү тартиби жөнүндө ошол жерден тааныштырылат.

Өкмөт "Коопсуз шаар" долбоорун ишке ашыруу үчүн өткөн айда 2 миллиард 552 миллион 706 миң 240 сомго тендер жарыялаган, тендер 10-августта жыйынтыкталмак. Тендер өткөрүү боюнча документтер менен иштеген жумушчу топ документке өзгөртүүлөрдү киргизгендиктен тендерди жыйынтыктоо мөөнөтү 23-августка жылдырылган.

Буга чейин "Коопсуз шаар" долбоорун ишке ашыруу үчүн 3 ирет сынак өткөрүлгөнү менен, уткан компаниялар менен соттошуу иши болуп, долбоор ишке ашпай келет.