Зилалиев сотто: "Мен курсант кызга эскертүү эмес, комплимент айткам"

Бүгүн, 24-августта Бишкек шаарынын Биринчи Май райондук сотунда мурдагы вице-премьер Дүйшөнбек Зилалиевдин иши боюнча соттук отурум өтүүдө.

Анда сот Зилалиевден ошол убакта кайсы кызматты аркалап жатканын жана бирөөгө эскертүү айтуу укугу бар же жок экенин сурады. Зилалиев формачан кызга эскертүү эмес, комплимент айтканын жана ал учурда Мамлекеттик мүлктү башкаруу боюнча фондунда төрага болуп иштегенин билдирди. "Айтматов атындагы көчөдө кетип баратканбыз, ал жерде автоунааны токтотууга тыюу салынган. Жол чырактын кызыл түсү күйгөнү үчүн токтогонбуз, атайын токтогон эмеспиз. Өткөндөгү соттук отурумда дагы жол коопсуздук кызматкери ал жерде автоунаа токтотууга болбой турганын айткан", - деди Зилалиев.

Буга чейин "Дело №" гезити 2017-жылдын 24-ноябрында президент Сооронбай Жээнбеков ант берип жаткан күнү "өкмөттүк жолго жардыруучу зат коюлган" деген жалган маалымат тууралуу жазган. Басылманын маалыматында, ИИМ академиясынын курсантына, кара Лексус айдап жүргөн белгисиз адам өкмөттүк жолго жардыруучу зат коюлганын айткан. Ал жерге Бишкек ШИИББинин ыкчам-тергөө тобу барып, шектүү эч нерсе табышкан эмес. Кийинчерээк бул маалыматты айткан Зилалиев экени белгилүү болуп, бул факт боюнча кылмыш иши козголгон. Дүйшөнбек Зилалиев болсо жогорудагы маалымат абсурд экенин, болгону курсант кыздын формасына сын айтканын билдирген.