Кубанычбек Кулматовдун камактагы мөөнөтү дагы бир айга узарды

Бүгүн, 24-августта Бишкек шаарынын Биринчи Май райондук сотунда Кубанычбек Кулматовдун баш коргоо чарасынын мөөнөтүн узартуу маселеси каралды. Сот отуруму жабык өттү. Сот залынан чыккан анын жактоочусу Сергей Слесарев соттун чечими менен тааныштырды. Анын айтымында, Кулматовду камакта калтыруу мөөнөтү 28-сентябрга чейин узартылды. Адвокат бул чечимге нааразычылыгын билдирип, шаардык сотко даттанарын белгиледи.

Айта кетсек, Кубанычбек Кулматов 2014-жылы Бишкек шаарынын мэри болуп турган кезде Калыс-Ордо конушундагы мектеп жана бала бакчага бөлүнгөн акчаны мыйзамсыз колдонгон деп айыпталууда.

Мындан улам ага 18-май күнү Кылмыш-жаза кодексинин 303-беренеси (коррупция) менен кылмыш иши козголуп, 5-июнда Биринчи Май райондук сотунун чечими менен 28-июнга чейин камакка алынган. Андан соң ушул эле райондук сот Кулматовду камакта калтыруу мөөнөтүн 28-августка чейин узарткан. Жогорку Сот да Кулматовду 28-августка чейин камакта калтыруу чечимин күчүндө калтырган.