КСДП Кубанычбек Кулматовдун ишинде саясий өңүт бар экенин айтууда

"Кубанычбек Кулматовдун ишинде саясий өңүт бар" деди КСДП париясынын өкүлү Кундуз Жолдубаева. Мындай пикирин SUPER.KG'ге ал бүгүн, 24-августта Биринчи Май райондук соту Кулматовдун камакта калуу мөөнөтүн 28-сентябрга узарткандан кийин билдирди.

"Биздин пикирде, Кулматовдун иши шашылыш, арыдан-бери кабыл алынга иш болуп жатат. Бул жерде кылмыш жагдайын көргөн жокпуз, иш саясий өңүттө кетүүдө", - деди Жолдубаева.

Бүгүн, 24-августта Бишкек шаарынын Биринчи Май райондук соту Кубанычбек Кулматовдун баш коргоо чарасынын мөөнөтүн узартуу маселеси карап, камакта калуу мөөнөтүн 28-сентябрга жылдырды.

Кубанычбек Кулматов 2014-жылы Бишкек шаарынын мэри болуп турган кезде Калыс-Ордо конушундагы мектеп жана бала бакчага бөлүнгөн акчаны мыйзамсыз колдонгон деп айыпталууда.

Мындан улам ага 18-май күнү Кылмыш-жаза кодексинин 303-беренеси (коррупция) менен кылмыш иши козголуп, 5-июнда Биринчи Май райондук сотунун чечими менен 28-июнга чейин камакка алынган. Андан соң ушул эле райондук сот Кулматовду камакта калтыруу мөөнөтүн 28-августка чейин узарткан. Жогорку Сот да Кулматовду 28-августка чейин камакта калтыруу чечимин күчүндө калтырган.