Жайкы Азия оюндары: Кыргыз капчыгында алгачкы алтын. Төрөкан Багынбай уулу жиу-житсу боюнча мелдештин жеңүүчүсү болду

Кыргыз спортчусу Төрөкан Багынбай уулу Индонезияда өтүп жаткан Жайкы Азия оюндарынын алтын медалын тагынды.

Бүгүн, 24-августта жиу-житсу боюнча мелдештер орун алып, анда 69 килограмм салмак ченинде Кыргыз өлкөсүнөн Төрөкан Багынбай уулу катышты. Ал финалдык баскычка чейин өтө алган.

Төрөкан Багынбай уулу финалдык беттеште Бириккен Араб Эмираттарынын спортчусу Алкирби Талиб менен күч сынашып, беттештин жыйынтыгында 2:0 эсеби менен жеңишке жетти.

Ал буга чейин 1/16 финалда ирандык спортчуну утуп, жарым чейрек финалда казакстандык Мансур Хабибуланы жеңди. Чейрек финалдык беттеште Багынбай уулу түркмөнстандык Желилмухаммед Хошанмурвдовду 2:0 эсебинде жеңип, жарым финалда таиланддык спортчунун үстүнөн 4:2 эсебинде жеңишке жеткен.

Муну менен Төрөкан Багынбай уулу Кыргыздын капчыгына алгачкы алтынды алып келди. Эми Кыргыз капчыгында жалпы 10 медаль болду, анын 1и алтын, 4ү күмүш жана 5и коло медалдар.

Маалымат үчүн: Жиу-житсу - япон күрөшүнүн түрү. Анда спортчулар куралсыз коргонуунун өзгөчө ыкмалары боюнча беттешет.