Баку шаарында Чыңгыз Айтматовдун 90 жылдыгына карата уюштурулган конференция өттү

Азербайжан өлкөсүнүн Баку шаарында Чыңгыз Айтматовдун 90 жылдыгына карата уюштурулган конференция өттү. Бул тууралуу SUPER.KG порталына Түрк тилдүү улуттардын жазуучулар биримдигинин Азербайжан өлкөсүндөгү жетекчиси Экбер Кошалы билдирди.

"Баку шаарында жазуучу Чыңгыз Төрөкуловичтин чыгармачылыгына арналган "Айтматов адамзатты бириктирген феномен" деп аталган конференция өттү. Иш-чара Айтматовдун 90 жылдыгына карата уюштурулган. Ага Кыргыз мамлекети, Казакстан, Өзбекстан, Азербайжан, Орусия жана Египет өлкөсүнөн келген адабият өкүлдөрү катышты. Чыңгыз Айтматов бир гана кыргыз элинин эмес, бүтүндөй түрк дүйнөсүнүн жазуучусу. Ал бүтүндөй дүйнөгө белгилүү жазуучу. Андыктан мындай иш-чаралар биздин өлкөбүздө байма-бай өткөрүлүп турушу шарт", - деди Экбер Кошалы.

Чыңгыз Айтматовдун 90 жылдыгына карата иш-чаралар Өзбекстан, Казакстан, Түркия жана башка бир нече өлкөлөрдө өтөрү пландалууда. Ал эми эл аралык "Түрксой" уюму 2018-жылды "Чыңгыз Айтматов жылы" деп жарыялаган.