Жамандын аты жар-жарда. Нарында жар бетине атын жазгандар аныкталды

Нарын районуна караштуу Соң-Көл көлүнө агып түшкөн Кажырты шаркыратмасынын жээгиндеги жар бетине "Миша+Кузя", "Канат", "Азим", "1666" деген жазууларды жазып кеткендердин ким экендиги аныкталды. Бул тууралуу бүгүн, 27-августта Нарын ОИИБинин басма сөз кызматы SUPER.KG порталына билдирди.

Маалыматка ылайык, Нарын РИИБинин кызматкерлери тарабынан жогорудагы жар бетине жазып кеткен адамдарды издөө иштери жүргүзүлүп, жыйынтыгында алар Кочкор районунун 37 жаштардагы Э.уулу.К. жана М.А. аттуу тургундары болуп чыгышты.

"Бул жарандар 10-июлда Соң-Көлгө эс алууга барып, андан ары Кажырты шаркыратмасына барышкан. Маалым болгондой, М.А. аттуу жаран аскага сакал алганда жибитүү үчүн колдонулган суюктук менен сүрөткө түшүү максатында жогорудагы жазууларды жазган. Жазуулардын жарымы жамгырга өчсө, жарымын колу менен өчүргөндүгүн айтып берген. Бул факты боюнча топтолгон маалыматтар Нарын РИИБинин тергөө кызматына текшерүүгө берилген", - деп билдиришти РИИБден.