Чүйдө "Кант" авиабазасынын аскер кызматкери эне-баланы сүзүп, окуя болгон жерден аял каза болду

Кант шаарынын Лебединовка айылында жол кырсыгы катталып, кырсыктын кесепетинен 42 жаштагы аял каза болуп, 3 жаштагы баласы ооруканада жатат. Бул тууралуу Чүй облустук Жол кыймылынын коопсуздугун камсыздоо бөлүмүнөн бүгүн, 28-августта билдиришти.

Маалыматка ылайык, жол кырсыгы 27-августта саат 12:30 чамасында болгон. Унааны орусиялык "Кант" авиабазасынын аскер кызматкери башкарып бара жаткан.

"42 жаштагы аял 3 жаштагы баласы менен жөө адамдар өтүүчү жолдон өтүп жатканда аны Hundai Tucson үлгүсүндөгү жеңил унаа келип сүзгөн. Кырсыктын кесепетинен аял окуя болгон жерден каза болуп, ал эми 3 жаштагы наристе балдар ооруканасына жеткирилген. Унаанын айдоочусу "Кант" авиабазасында иштеген капитан деп айтышууда. Учурда бул окуя боюнча тергөө иштери башталып, тийиштүү экспертизалар дайындалды", - деди маалымат катчы.