Орусияда кырсыкка кабылган Кыргыз жарандарынын аты-жөнү такталды

27-август күнү Орусиянын Москва шаарынан Санкт-Петербургга бараткан кичи автобус кырсыкка кабылып, андан 8 Кыргыз жараны жаракат алганы кабарланган. Бүгүн, 28-августта Кыргыз мамлекетинин Орусиядагы элчилиги кошумча маалыматтарды таратты. Андагы маалыматтарга караганда, жаракат алган 8 адам Ош облусунун тургундары болушкан. Бешөө дарыгерлердин текшерүүсүнөн кийин үйүнө чыгып кеткен болсо, үчөө дарылануусун ооруканада улантууда.

"Жаракат алган 1993-жылы туулган А.А.Д., 1985-жылы туулган Н.К.М. (жанында паспорттору жок) жана 1967-жылы туулган И.М.У. аттуу жарандар Кара-Суу районунун, ал эми 1985-жылы туулган Э.М.Х., 2000-жылы туулган Х.И.Н. аттуу жарандар Араван районунун тургундары болушкан. Алар дарыгерлердин жардамын алган соң үй шартында дарыланууга жиберилди. Ал эми Тосненск деп аталган ооруканада айдоочулардын бири 1967-жылы туулган С.Ш. жана 18 жаштагы Х.уулу.У. менен А.Т.Ч. аттуу жарандар дарылануусун улантууда. Алар алган жаракатынан улам 31-августка чейин аталган ооруканада дарыланышат", - деп кабарлашты элчиликтен.

Кырсыкка кабылган маршруттук таксиде 2 айдоочу жана 15 жүргүнчү болгон.