Волейбол боюнча Кыргыз курама командасы Азия оюндарынын алкагында биринчи жолу жеңишке жетишти

Волейбол боюнча Кыргыз курама командасы Жайкы Азия оюндарынын алкагында Казакстан курамасын утуп алды.

Бүгүн, 28-августта Жакарта шаарында өтүп жаткан Азия оюндарында волейбол боюнча улуттук командалар 13-18-орундар үчүн беттешти. Анда Кыргыз курама командасы Казакстан курамасы менен кез келди.

Беттештин биринчи партиясында Кыргыз волейболчулары оюндун нугун башкара алганы менен 27:29 эсебинде жеңишти тарттырып жиберишти. Экинчи партияда 25:23 эсебинде жеңишке жетишти. Үчүнчү партияда Казакстан командасы алдыга озуп, 23:25 эсеби менен жеңишке жетишсе, төртүнчү партияда Андрей Анкудиновдун шакирттери 25:23 эсебинде жеңишке жетишти. Чечүүчү бешинчи партияда Кыргыз волейболчулар 15 упай алып, жалпы 15:7 эсеби менен жеңишке жете алды.

Муну менен Кыргыз волейболчулары Индонезияда өтүп жаткан Азия оюндарында алгачкы жолу жеңишке жетти.