Жалал-Абадда туу көтөргөн студент эс-учун жоготуп кулап кала жаздады

Бүгүн, 31-август күнү Жалал-Абад шаарында Эгемендүүлүк майрамында туу көтөрүп турган студент өзүн жаман сезип, кулап кала жаздаган видеосу интернетке тарады.

Видеодо тууну кармап турган баланын кулап кала жаздаганын байкап калгандардын бири жардамга келип, аны ары жакты көздөй алып кеткенин көрүүгө болот.

Өзүнүн аты-жөнүн атоодон баш тарткан күбө SUPER.KG'ге окуянын чоо-жайын айтып берди.

"Бул майрамдык салтанатка студенттер эртең мененки саат 7ден баштап чогулушкан. Бирок майрамдык салтанат саат 09:30да башталган. Андан соң алар тууну бир жарым сааттай кармап турушту. Алардын катарында турган студенттердин бири эс-учун жоготуп, жыгылып кала жаздаганда телеканалдардын биринин оператору барып кармап калып, "Тез жардам" унаасына алып барган. Аны текшерген дарыгерлер студенттин кан басымы көтөрүлүп, бир жагынан ачкалыгы себеп болгонун айтышты. Студент бала дарыгерлер текшергенден кийин үйүнө жеткирилди", - деди күбө.

Ал бүгүнкү майрамдык иш-чарада дагы бир студент өзүн жаман сезип, кулап калганын кошумчалады. Майрамдык салтанатка 500гө жакын мектеп окуучулары жана студенттер тартылган.