Ошто бала бакчада 4 жаштагы наристе чарчап калды. Ата-энеси анын талма оорусу бар экенин айтышкан

Ош шаарында 4 жаштагы наристе бала бакчада талма оорусунан улам каза болду. Бул тууралуу Ош ШИИБинин басма сөз кызматы кабарлады.

Маалыматка ылайык, окуя 28-август күнү Ош шаарындагы бала бакчалардын биринде болгон.

"4 жаштагы Р. аттуу наристенин түшкү тыныгуу учурунда уктап жатканда талма оорусу кармаган. Тарбиячылар ошол замат "Тез жардам" кызматын чакырышып, бирок наристе алар келгиче чарчап калган. Ал эми наристенин ата-энеси чакыртылганда алар "Бала бакчага албай коёбу деп, оорусун жашырууга аргасыз болгонбуз" деп айтып берген.

Ошондой эле алар эч кимге дооматы жок экенин айтып, кызын медициналык экспертизага берүүгө макул болушкан эмес. Учурда бул окуя боюнча кылмыш иши козголгон жок. Милиция кызматкерлери тарабынан бала бакчанын кызматкерлери суракка алынып, териштирүү иштери жүрүүдө", - деди маалымат катчы.