Донецк Эл Республикасынын башчысы Александр Захарченко жардыруудан каза болду

Донецк Эл Республикасынын башчысы Александр Захарченко жардыруудан каза болду. Бул тууралуу орусиялык басылмалар жазып чыгышты.

Кечээ, 31-августта Донецктин борборунда жайгашкан "Сепар" кафесинде жардыруу болгон. Жардыруунун кесепетинен 1 адам каза болуп 3 адам оор жаракат алган. Каза болгон Донецк Эл Республикасынын башчысы Александр Захарченко экенин, ал эми жаракат алгандардын бирөө кирешелер жана чогултуулар министри Александр Тимофеев экенин расмий тараптар тастыкташкан.

"Жарылуучу зат кафеге алдын ала коюлган. Азыркы тапта кылмышка шектүүлөр кармалды. Захарченко башынан жаракат алып көз жумду. Аталган теракт Украинада даярдалганын кылмышка шектүүлөр айтып, кылмышты моюнуна алып жатышат", - деп билдирген Захарченконун кеңешчиси Александр Казаков.

Ал эми Орусиянын президенти Владимир Путин Захарченконун өлүмүнөн кийин атайын кайрылуу жасап, Донецк Эл Республикасынын маркум башчысы Донбасстын чыныгы патриоту, чечкиндүү, эр жүрөк башчы болгонун айткан. Ошондой эле Путин өлкө башчысын мындай жол менен өлтүрүү бул жүзү каралык экенин кошумчалаган.