Иосиф Кобзондун өлүмүнө сүйүнгөн орусиялык Биринчи каналдын кызматкери жумуштан бошотулду

Иосиф Кобзондун өлүмүнө сүйүнгөн Орусиянын Биринчи каналынын жарнама бөлүмүндө иштеген кызматкер Сергей Артёмов жумуштан бошотулгандыгы тууралуу орусиялык маалымат каражаттары жазып чыгышты.

Белгилүү болгондой, СССРдин Эл артисти Иосиф Кобзон көз жумган соң Артёмов өзүнүн Фейсбуктагы баракчасына "Чын эле! Кечиргиле. Эч качан мындай нерсеге кубанган эмесмин. Бирок ал буга татыктуу" деген билдирүү жазып кийин өчүрүп койгон.

Эгерде айрым интернет колдонуучулар Сергей Артёмов өлкөнүн эң негизги каналдарынын биринде иштей тургандыгын жазып чыгышпаса, анын жарыялаган билдирүүсү байкалбай калмак. Эң биринчилерден болуп кызматкердин билдирүүсүн журналист Евгений Додолев сынга алган. Ал билдирүүнүн скриншотун жарыялап "Биринчи каналдын кызматкери биздин эстраданын титаны Иосиф Кобзон жөнүндө" деп жазган.

Социалдык тармактарда кызуу талкуунун чордонуна айланган кызматкерди жумуштан бошотуу тууралуу чечим чыккандыгын Биринчи каналдын өкүлдөрү билдиришкен.