Эрдоган: "Фето" уюмунун артында АКШ турат"

"Фето уюмуна АКШ колдоо көрсөтүүдө". Мындай сөздү Түркиянын президенти Режеп Тайып Эрдоган Кыргыз-Түрк бизнес-форумунда айтты.

Ал аталган уюм коркунучтуу экенин баса белгиледи. "Түрк-Кыргыздын жакын мамилеси мурда да болгон, азыр да бар, мындан кийин ошондой болушун каалайм. Быйыл Түркияга 40 миллион турист келди. Бул багытта биздин чоң тажрыйбабыз бар. Буга чейин 4300 Кыргыз жаштары "Түркия стипендиялары" программасы менен биздин өлкөдө окуп кетти. Азыр да жүздөгөн Кыргыздын студенттери Түркиянын абройлуу окуу жайларында окуп жатат", - деди Эрдоган.

Андан сырткары ал Түркияда экстремисттик деп табылган "Фето" уюму жөнүндө айтып өттү. "Учурда 160 өлкөдө "Фето" уюму иштеп жатат. Анын башчысы болсо АКШда отурат. Демек, анын артында АКШ турат", - деди Түрк президенти.

Аталган уюмдун негиздөөчүсү делген дин аалымы Фетхуллах Гүлен учурда АКШда жашап келет. Буга чейин аны өткөрүп берүү талабы боюнча Түркия АКШга бир нече жолу кайрылган. Бирок алардын аракети ишке ашпай келет.