Кыргыз курама командасы Жайкы Азия оюндарында жалпы 20 медаль утту

Индонезияда өткөн 18-Жайкы Азия оюндарында Кыргыз курама командасы жалпы 20 медаль утуп оюнду жыйынтыктады.

Спорттун 26 түрүнөн Кыргыз өлкөсүнүн намысын 100дөн ашуун спортчу коргоду. 14 мелдеш күндүн жыйынтыгында спортчулар 2 алтын, 6 күмүш жана 12 коло медаль тагынышты. Азия оюндарынын чемпиону наамын жиу-житсучу Төрөкан Багынбай уулу жана жөө күлүк Дарья Маслова алды.

Жалпы медалдык эсепте Кыргыз өлкөсү 22-орунду ээледи. Ал эми 1-орунда 132 алтын, 92 күмүш, 65 коло медалы менен Кытай турса, 2-орунду 75 алтын, 56 күмүш, 74 коло медалы менен Япония ээлеген. Үчилтикти Түштүк Корея жыйынтыктайт, аларда 49 алтын, 58 күмүш, 70 коло медаль бар.

Бүгүн, 2-сентябрда триатлон боюнча медалдар ойнотулат, анда Кыргыз өлкөсүнөн катышуучулар жок. Ошондой эле бүгүн Азия оюндарынын жабылуу аземи болуп өтөт. Аталган салтанатта Кыргыз өлкөсүнүн желегин дзюдочу Бекболот Токтогонов көтөрүп чыгат.