Көчмөндөр оюндарынын катышуучуларын транспорт менен камсыздоо үчүн Бишкек мэриясы 20 автобус жиберди

III Дүйнөлүк көчмөндөр оюндарынын катышуучуларын транспорт менен камсыздоо үчүн Бишкек мэриясы 20 автобус жиберди. Бул тууралуу мэриянын маалымат кызматынан кабарлашты.

Маалым болгондой, шаардын вице-мэри Геннадий Милицкийдин жетекчилиги астында автобустар 1-сентябрда Ысык-Көлгө жөнөп кетишкен. 20 автобус тең оюндар аягына чыкканга чейин катышуучулардын кызматында болот.

III Дүйнөлүк көчмөндөр оюндарынын ачылышы бүгүн, 2-сентябрь күнү саат 20:00дө Чолпон-Ата шаарында жайгашкан ат майданында орун алат.

Мелдештерде 82 өлкөдөн келген спортчулар арасында 549 медалдар топтому ойнотулат. Алардын ичинен 174 алтын, 173 күмүш жана 247 коло медаль.

Азыркы тапта оюндардын алгачкы жеңүүчүлөрү белгилүү болду. Анда тажик күрөшү боюнча балбандар Артур Зулкарнаев жана Аннамурад Мурадов оюндардын чемпиону аталышты.