Кырчын жайлоосунда дааратканаларда кезек күтүү бир сааттан ашык созулууда

Бүгүн, 3-сентябрда Кырчын жайлоосунда III Дүйнөлүк көчмөндөр оюндарынын алкагында өтө турган Этнофестивалдын ачылышы орун алууда. Бүгүн жайлоого чет элдик коноктор да келе баштаган.

Учурда жайлоодогу ажатканаларга кезек күтүү көп убакытка созулуп жатканын SUPER.KG'нин жериндеги кабарчысы билдирди. Анда ар бир дааратканага аз дегенде 70-80ден киши кезек күтүп турат. Кезек күтүү 1 сааттан ашык убакытты алып жатат.

Буга чейин жайлоого орнотула турган дааратканалар үчүн 2 миллион 300 миң сом каражат бөлүнгөнү маалымдалган. Коомчулук ажатканага бөлүнгөн сумманы сынга алган эле. Ал эми Архитектура, курулуш жана турак жай-коммуналдык чарба мамлекеттик агенттиги 5 орундуу контейнер тибиндеги 8 даараткана жана бир орундуу жыгачтан 20 даараткана орнотула турганын маалымдаган. 5 орундуу дааратканалардын ар бири бардык чыгымдарды эсепке алганда 287 миң 718 сомду түзгөн. Ал эми бир орундуу 20 дааратканага 375 миң 600 сом сарпталган.

Андан кийин курулган дааратканалардын булганыч абалынын сүрөтү жарыяланып коомчулук анда даарат кагаз, самын, абаны жыттандыргычтар жок экенин айтышкан. Оюндун уюштуруучулар тобу эл өзү ажаткананы булгап жатканын айтып, андагы тургундарды тазалыкка чакырган. Ошондой эле уюштуруучулар абал бүгүнкүгө чейин жөнгө салынарын белгилеген.