Көчмөндөр оюндары: Казакстан менен Красноярск курамасынын көк бөрү боюнча оюну болбой калды

Казакстан менен Красноярск курамасынын көк бөрү боюнча оюну болбой калды. Бул тууралуу SUPER.KG'ге 3-сентябрда Жаштар иштери, дене тарбия жана спорт мамлекеттик агенттигинин коомчулук менен байланыш бөлүмүнүн башчысы Нурдин Султамбаев кабарлады. Анын айтымында, Казакстандын курамасы оюнга келген жок.

Буга чейин айрым интернет колдонуучулар социалдык түйүндөргө Казакстан курамасы оюнга каршылык жазып, беттешке чыгуудан баш тартканын жазып жатышкан.

"Казак командасынын каршылык жазган каты бизге келе элек. Жазган же жазбаганын айта албайбыз. Бирок бүгүн Красноярск курамасы менен ойношу керек эле, келишкен жок. Мындай учурда келбей калган команда жеңилди деп саналат", - деди Султамбаев.

2-сентябрь күнү чүчү кулак тартышууда 12 команда 4 тайпага бөлүнүп ойномокчу болушкан. Чүчү кулактын жыйынтыгында "А" тайпасына Кыргыз, Алтай жана Монголия курамалары, "Б" тайпасына Москва, Кытай жана Ооганстан, "С" тайпасына АКШ, Казакстан, Красноярск, "Д" тайпасына Башкортостан, Франция жана Өзбекстан курамасы кирген.

Бүгүн кытайлык команда мандаттык комиссиядан өтпөй калып, жыйынтыгында мелдеште жалпы 11 команда калган. Ал эми Кыргыз курама командасы өзүнүн алгачкы беттешинде Монголиядан келген команданы 29:5 эсебинде утуп алган.