Бүгүн Кырчында үйлөнө турган жигит: "Көпчүлүк элдин батасын алалы деп жайлоодо үйлөнүүнү туура көрдүк"

Бүгүн, 4-сентябрда Кырчын жайлоосунда III Дүйнөлүк көчмөндөр оюндарына катар жаш түгөйлөрдүн үйлөнүү тою өтөт. Бул тууралуу SUPER.KG'ге үйлөнө турган жигит Союзбек Надырбеков билдирди.

Надырбеков - өзү Дүйнөлүк көчмөндөр оюндарынын катчылыгынын мүчөсү. Ал аталган оюндардын илимий, инфраструктура жана ыктыярчылар кыймылы багыты боюнча иш алып барат.

"Азыркы тапта мен жайлоодо уюштуруучулардын кийими менен эле, өз жумушумду аткарып иштеп жатам. Бирок ичимден аябай толкунданып жүрөм. Кечке жуук жайлоодогу "Кийиз ордодо" тоюбуз белгиленет", - деди ал.

Надырбековго III Дүйнөлүк көчмөндөр оюндарынын жүрүшүндө үйлөнүүнү оюндун уюштуруучулар тобу сунушташкан.

"Биз, уюштуруучулар тобу жыйналып, жайлоого кооз кыргыз айылы жайгаштырылгандан кийин кыргыздын салты менен үйлөнүү тою өтсө абдан жакшы көрүнүш болмок деп сүйлөшкөнбүз. Бирок ошол учурда мен ичимден "эми ага ким макул болмок эле" деп күлгөм. Көп өтпөй башкы режиссёр Алтынбек Максүтов мага үйлөнүү тоюмду Кырчында өткөрүүнү сунуштады. Бул сунушту кабыл алуумду уюштуруучулар тобу да айтып жатышты. Ойлонуп көрсөм, мыкты идея, мыкты декорация, чыныгы кыргыздын улуттук кийимдери, музыкасы, боз үй, самоор, айтор мындай масштабда президенттин да баласы үйлөнө албаса керек. Эң башкысы канчалаган эл келет, баарынын батасын аласың. Ушуларды ойлоп бул сунушту туура көрдүм", - дейт ал.

Ал эми колуктусу мындай сунушту кубануу менен кабыл алып, өзгөчөлүү үлпөт той өтөрүнө ынанарын билдирген.

"Мен үйлөнүп жаткан бийкеч Айжаркынга бул идея аябай жакты, жайлоодо, кыргыз айылында тоюбуз өтөрүнө сүйүнүүдө" деди Надырбеков.

"Өтө өзгөчөлүү той бизге буюрат деп такыр ойлогон эмесмин. Негизгиси келген элдин батасы тийип, бактылуу жашасак деп тилек кылабыз", - дейт колукту.

Ал эми үйлөнүп жаткан жигит чет элден келген коноктор да бүгүн алардын жакшылыгына күбө болушарын кошумчалады: "Ушунча чоң масштабга биз кыргыз элинин үйлөнүү тоюндагы салттарын көрсөтөбүз, таанытабыз. Азыркы тапта тойго бардык даярдыктар жүргүзүлгөн. Мен ушундай шартта үйлөнүп жатканымды сыймыктануу менен кабыл алдым. Анткени кыргыздын нукура жашоосун чагылдыруунун өзү сыймык".