Өзбекстанда тилемчилерди жазага тартуу боюнча мыйзам каралууда

Өзбекстанда тилемчилерди жазага тартуу боюнча мыйзам долбоору коомдук талкууга коюлду. Бул тууралуу өзбек басылмалары жазып чыгышты.

Маалыматка ылайык, мындан ары коомдук жайларда тилемчилик кылгандарды административдик айыпка тартып, эгер дагы кайталанса 360 саатка коомдук жумуштарга же 1 жылдан 3 жылга чейин эркинен ажыратуу маселеси талкууланып жатат. Ал эми жашы жете элек балдарды, кары-картаңдарды жана майыптарды мажбурлоо жолу менен кайыр сураткан жарандар 5 жылдан 8 жылга чейин камалат.

Белгилей кетсек, 2014-жылы Түркияда тилемчилик кылууга тыюу салган мыйзам долбоору кабыл алынган. Мыйзамга ылайык, коомдук жайларда кайыр сурагандарга ири суммада айып пул салынат же эркинен ажыратылат. Ал эми Кыргыз өлкөсүндө тилемчилик кылгандарды аймактык тескөөчүлөр профилактикалык маек жүргүзгөн соң коё беришет. Жашы жете элек балдар үйлөрүнө өткөрүлүп берилет.