Роналду, Салах, Модрич ФИФАнын "жылдын мыкты оюнчусу" наамына ат салышат

Криштиану Роналду, Мохаммед Салах жана Лука Модрич ФИФАнын "жылдын мыкты оюнчусу" наамына ат салышат. Мындай маалымат ФИФАнын расмий сайтына жарыяланды.

Маалыматка ылайык, жеңүүчү 24-сентябрда өтө турган сыйлык тапшыруу аземинде аныкталат. Жеңүүчүнү аныктоо үчүн ФИФАга мүчө болгон курама командалардын машыктыруучулары жана капитандары, күйөрмандар жана журналисттер добуш беришет.

Аталган сыйлыкка Роналду 10-жолу көрсөтүлүп жаткан болсо, Модрич менен Салах алгачкы ирет алдыңкы үчтүктөн орун алышкан. Күйөрмандар үчүн 2007-жылдан бери үзгүлтүксүз мыкты үчтүктүн катарына кирип келген аргентиналык Лионель Мессинин жана Франция курама командасын Дүйнө чемпиондугуна жетелеп келишкен Антуан Гризманн менен Киллиан Мбаппенин жоктугу күтүүсүз болду. Буга чейин көпчүлүк учурда сыйлыктын ээлери Дүйнө чемпиондугун уткан команданын оюнчусу болсо, бул ирет финалчылардын катарында бир да Дүйнө чемпиону жок.

Өткөн сезондо Салах Ливерпуль клубу менен Чемпиондор Лигасынын финалында Роналду менен Модричтин командасынан жеңилип калган. Ал эми Дүйнө чемпиондугунда Салах топтук баскычта, Роналду жарым-чейрек финалда үйлөрүнө кайтып, Модрич финалга чейин жеткен.

Белгилей кетсек, 30-августта УЕФАнын "жылдын мыкты оюнчусу" наамына да ушул эле оюнчулар ат салышып, сыйлыкты Модрич илип кеткен.