Кырчында театрлашкан көрсөтүүгө катышкан 3 топоз жоголуп кетип, милиция 1 күндөн кийин таап берди

III Дүйнөлүк көчмөндөр оюндарына карата Кырчын жайлоосуна орнотулган милициянын пунктуна 41 жаштагы жаран 3 топозу жоголуп кеткенин айтып кайрылган. Бул тууралуу Ысык-Көл облусунун маалымат катчысы SUPER.KG порталына кабарлады.

Берилген маалыматка ылайык, топоздордун ээси - Алай районунун Сары-Моңол айылынын тургуну Ражан Кадыров. Анын 3 топозу спорттук оюндардын ачылыш аземиндеги театрлашкан бөлүгүнө катышкан.

"Расмий ачылыш аземден кийин Кадыров топоздорун боз үйдүн жанына оттотуп коюп, өзү оюндарды көргөнү кеткен. Ал кайтып келген учурда кароосуз калган жаныбарлары жок болгон. Милиция издөө иштерин жүргүзүп, бир күндөн кийин этношаарчадан 25 чакырым алыстыктан, Григорьев айылына жакын жерден табылган. 3 топоз тең ээсине кайтарылды", - деди маалымат катчы.