Ош ШИИБи: "Ошто 7 айлык баласы менен көп кабаттуу үйдөн секирген келин жолдошуна таарынып, төркүнүндө жүргөн"

Ош шаарына конокко келген келин колундагы 7 айлык баласы менен жатакананын төртүнчү кабатынан боюн таштаган окуянын чоо-жайын Ош ШИИБинин басма сөз кызматы билдирди.

Маалыматка ылайык, окуя 6-сентябрь күнү саат 17.00гө жакын Ош шаарындагы Урицкий кѳчѳсүндѳ жайгашкан кѳп кабаттуу жатакананын 4-кабатында орун алган. Анда коридордун ачык турган терезесинен Чүй облусунун 1978-жылы туулган тургуну ушул жылдын февраль айында туулган уулу менен кошо боюн таштап жиберген.

"Эне-бала денесинен жаракат алышкан. Наристе балдар ооруканасына жеткирилсе, келин облустук бейтапканага жеткирилген. Дарыгерлердин айтуусуна караганда, учурда экѳѳнүн тең ден соолуктары канааттандырарлык. Бул окуя боюнча соттук-медициналык жана соттук-биологиялык экспертиза дайындалып, жагдай боюнча ар тараптуу текшерүү иш-чаралары жүрүүдө. Алгачкы териштирүүнүн жыйынтыгында, жабырлануучу ѳмүрлүк жолдошу менен Чүй облусунда жашап жатып, аны менен таарынышып, эки баласын кайненесине таштап, кичүү баласын колуна алып, август айынын ортосунан тартып Ошто жашаган бир тууган эжесинин үйүндѳ жашап жаткан. Айрым күбѳлѳр акыркы мезгилдерде күйѳѳсү менен пикир келишпестиктен улам, спирт ичимдиктерин кѳп ичип жүргѳндүгүн айтышты. Окуя болгон күнү да алкоголь ичимдигин ичкендиги айтылууда. Учурда Ош шаардык ички иштер башкармалыгы тарабынан окуя "ѳзүн-ѳзү ѳлтүрүүгѳ аракет жасоо" беренеси менен катталып, иликтѳѳ иштери жүрүп жатат", - деди маалымат катчы Замир Сыдыков.