Орусия өкмөтү курулуш тармагында иштеген мигранттардын санына чектөө киргизүүнү сунуш кылууда

Орусиянын вице-премьер-министри Татьяна Голикова курулушта иштеген жалпы мигранттардын санына чектөө киргизүүнү сунуш кылды. Бул тууралуу орусиялык басылмалар жазып чыгышты.

Голикованын айтымында, өкмөт 2019-жылдан тарта курулушта иштеген чет өлкөлүктөрдүн санына чектөө киргизүүнү демилгелеп жатат. Жаңы сунушка ылайык, курулуш компанияларында иштеген сырттан барган мигранттардын саны жалпы жумушчулардын 80 пайызынан ашпашы керек. Бул чектөө Москва, Хабаровск жана Амур облустарынан башка аймактарга киргизилет.

Татьяна Голикова аталган мыйзам долбоору менен учурда тийиштүү мекемелер таанышып, макулдашуу иштери жүрүп жатканын белгилейт. Ошондой эле "Росстат" мекемесинин маалыматына таянуу менен курулуш тармагында 6 миллион 300 миң адам иштээрин белгилеп, алардын канчасы мигранттар экенин так айткан эмес.