Өлкөнүн жылытуу системин жаңылоо үчүн канча каражат керек болору айтылды

Өлкөдөгү жылуулук тармагын жаңылоо үчүн 500 миллион доллар керектелет. Бул тууралуу парламенттин тармактык комитетинин жыйынында Өкмөттүн Отун-энергетикалык комплексти жөнгө салуу боюнча мамлекеттик комитетинин төрагасынын орун басары Айтмамат Кадырбаев билдирди.

Ал учурда жылытуу системинин куурларынын 75 пайызынын эскилиги жеткенин айтты.

Өкмөт АРИС уюму менен биргеликте жылуулук тармагына 31 миллион доллар жумшамакчы. "15 миллион доллар грант түрүндө берилет. Анын 5 миллион доллары Нарын, Ош облустарынын аз камсыздалган үй-бүлөлөрүнө иштетилет. Жалпысынан 14 миң даана жылытуу мешин сатып алып беребиз. Бул боюнча тендер өткөрүлөт. Болжолдонгондон аз каражат жумшалса, мештердин санын көбөйтүшүбүз мүмкүн. Андан сырткары 7 облустан үчтөн бала бакча менен мектептин жылытуу системин жаңылап беребиз", - деди АРИСтин өкүлү.

Парламенттин бюджет жана финансы комитетинде Кыргыз мамлекети менен Эл аралык өнүктүрүү ассоциациясынын ортосундагы каржылоо туурасындагы макулдашуу каралууда.