Тазабек Икрамов: "Дарыгерлерди кайрадан ант бердириш керек"

"Дарыгерлер кайрадан ант бериши керек". Мындай сунушту депутат Тазабек Икрамов парламенттин социалдык маселелер, билим берүү, илим жана маданият комитетинин жыйынында билдирди.

Ал дарыгерлер өз милдеттерин аткарбай жатат деген пикирде.

Депутаттар Алмазбек Токторов менен Гүлкан Молдобекова саламаттыкты сактоо тармагындагы кылмыштар үчүн кимдер жазага тартылганын сурады. "Жакында эле төрөтканадан ымыркай сатуу фактысы катталды. Ушул боюнча ким жооп берди?" - деп сурады Токторов.

Саламаттыкты сактоо министри Космосбек Чолпонбаев бул багытта атайын кызматтык иликтөө жүрүп жатканын айтты. "Буга чейинки кылмыштар боюнча укук коргоо органдары иш алып барышууда" деп жооп берди министр.

Гиппократ анты - бул ар бир дарыгер кызматка киришер алдында берилчү ант болуп эсептелинет. Алар туура, таза жана чын жүрөктөн иштөө боюнча аталган антты беришет.