Москвада өрттөн кемпирди куткарган кыргыз жигити: "Мен аны сыртка чыгарсам, ал документ алышым керек деп батирге жулунду"

Өткөн аптада Москва шаарындагы "Тверская" метросундагы көп кабаттуу үйдөгү батирлердин биринен өрт чыккан. Айнегинен чыгып жаткан кара түтүндү байкаган кыргыз жигит биринчилерден болуп үстүнө чыгып, өз өмүрүн тобокелге салып күйүп жаткан батирден 80 жаштагы кемпирди алып чыккан. Ал 25 жаштагы Азамат Мамажакыпов экенин окурмандар "Элдик кабар" аркылуу билдиришкен.

Мамажакыпов Кара-Кулжа районунун тургуну. Москвада акыркы бир жылдан бери иштеп келет. Биз ага байланышып, окуянын чоо-жайын билдик.

"Кырсык болгон күнү биз ошол метродо гүл эгип иштеп жүргөнбүз. Бир маалда айланадагылар үстүңкү кабатта батир өрттөнүп жатканын айтып калышты. Бул нерсени угарым менен өрттөнүп жаткан 3-кабаттагы батирге чуркадым. Ичинде болжол менен 80-85 жаштагы кемпир түтүнгө ууланып, чыга албай бөлмөнүн ичинде бир нерсе издеп жатыптыр. Мен аны дароо подъездге чыгардым. Ал каршылык көрсөтүп, "кайра кирем, үйдүн документин табышым керек" деп батирге кирүүгө аракеттенди. Мен болбой, босогону тосуп алып аны киргизбей койдум", - дейт Мамажакыпов.

Анын айтымында, өрт чыккан батирге эч ким киргиси келбей өз өмүрүнөн кооптонушкан. Себеби газ жарылып кетүү коркунучу болгон.

"Мен деле аны ойлодум, бирок ал батирде кимдир бирөө жардамга муктаж деген ой мени токтото алган жок. Кийин сыртка чуркап чыгып, жардамга кишилерди чакырдым. Артымдан эки кыргыз жигит, эки Орус жараны кирди. Мен шлангды сүйрөп, ала келгем, артымдан келген адамдар менен чогуу батирдин ичинде жалбырттаган отко суу чачып өрттү өчүрүүгө аракет кылдык. Кийин өрт өчүрүүчүлөр келди, "Тез жардам" кызматы келип өрттөн жабыркаган кемпирди ооруканага алып кетишти.

Биз өрт чыккан батирге кошуна жашагандардын эшиктерин каккылап, алардын коопсуздугу үчүн сыртка чыгууга чакырдык. Сыртка чыксак аябай көп эл чогулуп калыптыр. Мен жумушума шашып кетип калдым, ошол бойдон ал жакка барган жокмун. Өзүм да түтүнгө ууланып калыптырмын, бирок ооруканага баруудан баш тарттым. Учурда мекениме келгем, эми дарыгерлерге көрүнөм", - дейт мекендешибиз.