"Жебе" тобунун солисти Минур үйлөнүү тоюн өткөрдү (фото)

Той башталганда эки жашты Кенже Дүйшеева меймандардын алдына жетелеп кирди. Анткени ал өкүл апа, жолдошу өкүл атанын милдетин алышкан. Бешинчи өкүл балам деп сүйүнгөн ырчы Кенже Дүйшеева "Минур менден апкаарып, сүрдөгөн окшойт, өкүл апа болуп бериңиз, көптөн бери айта албай жүргөм деп жазып коюптур. Аябай күлдүм, сүйүндүм" деп билдирди.

Тойдун биринчи бөлүгүндө жалаң гана каалоо-тилектер айтылса, экинчи бөлүгү оюн-зоок, ыр бий менен коштолду. Эки жашка бакыт тилеп жакындары, достору, ырчылардан Гүлнара Кахарова, Роза Шакирова, Азиза, Курал Чокоев баштаган шоу-бизнес өкүлдөрү келишти.
"Жебе" тобунан Самат Жетигенов жана Кумар Сагын уулу уюштуруу иштерин моюнуна алып, чуркап жүрүштү. Ал эми төртүнчү солисти Медер Сагын уулу чет өлкөдө болгондуктан тойго келе албай калган.

Албетте, топтун башка мүчөлөрүнүн кубанычында чек жок. Муну алардын толкундануусунан улам сезсе болот. Кумар сөз арасында "Байкем Медер үйлөнүп мага жол ачып берсе, мен деле үйлөнүүгө даярмын" деген оюн билдирди. Ал эми Самат Жетигенов "Акчам калбай калган күндөрү Минур жолго 10 сомдон берип турчу" деп толкунданганынан көзүнө жаш алды. Анын жанында турган жубайынын да кубанычтан көзүнө жаш тегеренди. Той абдан эмоцияларга бай өттү. Салтка айланган эки жаштын тоюнда булуттардын арасын элестеткен атмосферада ак бийге түшүүсү, чоң тортту кесүү жана башка шоу орун алды.