"Apple" компаниясы 2 SIM карталуу жаңы телефонун чыгарды. Баасы 129 миң сомго чейин

"Apple" компаниясы адаттагыдай күзүндө жаңы телефондорун презентациялады. Бул ирет АКШлык компания коомчулукка iPhone'дун 3 үлгүсүн коомчулукка көрсөттү. "Apple'дин" жаңы телефондорунун аталышы - XS, XS Max жана XR.

XS былтыркы iPhone X'тин жаңыланган версиясы болсо, XS Max'тын экранынын өлчөмү 6,5 дюйм болду. Ал эми XR аталышындагы iPhone бюджеттик версия делгени менен арзан деп айтууга болбойт.

iPhone XS жана XS Max

IPhone XS менен XS Max үлгүлөрү сырткы көрүнүшү боюнча iPhone X'тен айырмаланбайт. Бирок бул ирет аталган телефондор жаңы Apple A12 Bionic аттуу процессорго жана жакшыртылган камерага ээ болуп, максималдуу эс-тутуму 512 гигабайтты түздү.

Андан тышкары, аталган телефондор эки SIM-карталуу болот, бирок Кытай аймагында чындап эки SIM-карта салынса, башка аймактарда экинчи SIM-картасы виртуалдуу болот.

Жаңылоонун дагы бири бул телефондор 3 түстө чыгат, көнүп калган боз жана күмүш түстөрүнө бул ирет алтын түстөгү телефондор кошулат.

iPhone XS:

Экранынын өлчөмү 5,5 дюйм жана 2560x1440 пикселдүү Super Retina (OLED) дисплейи орнотулган.

Баасы: 64/256/512 ГБ - 88 миң 600/ 101 миң 700 / 119 940 сом;

iPhone XS Max:

Экранынын өлчөмү 6,5 дюйм жана 2688х1242 пикселдүү HDR OLED дисплейи орнотулган .

Баасы: 64/256/512 ГБ — 97 миң 700 / 110 миң 800 / 129 миң сом.

iPhone XR

Көпчүлүк Apple'ден iPhone X'тин мүмкүнчүлүктөрү менен бюджеттик телефон күтүп жаткан, бирок компания аны башкача ишке ашырды. Жаңы iPhone XR - iPhone 8 менен iPhone X'тин чагылыштыруу болду. Жаңы телефондо IPS-экран, бир объективдүү камера, OLED экран жана Face ID болот. iPhone XR алты түстө сатыкка чыгат. Алар: ак, кара, кызыл, сары, көк жана маржан түстүү болот.

iPhone XR:

Экранынын өлчөмү 6,1 дюйм жана 1792х828 пикселдүү болуп, максималдуу эс-тутуму 256 гигабайт болот.

Баасы: 64/128/256 ГБ - 65 миң 500 / 69 миң 500 / 78 миң 600 сом.

Аталган смартфондор 2018-жылдын 28-сентябрынан баштап сатыкка чыгары айтылып жатат.