УКМК Жантөрө Сатыбалдиевди ооруканага чыгаруудан баш тартты

УКМК абакта жаткан мурдагы өкмөт башчы Жантөрө Сатыбалдиевди ооруканага чыгаруудан баш тартты. Бул тууралуу SUPER.KG'ге 13-сентябрда Кыйноолордун алдын алуу улуттук борборунун жетекчиси Нурдин Сулайманов кабарлады. Анын айтымында, УКМК Сатыбалдиевди ооруканага чыгарууга азырынча зарылчылык жок экенин түшүндүргөн.

"Жантөрө Сатыбалдиев 2003-жылдан бери жүрөк оорусунан улам Кардиология борборунда каттоодо болуп, 2013-жылы операция жасаткан экен. Буга байланыштуу анын ден соолугуна тынчсызданып жактоочусу жана жакындары биздин борборго кайрылышкан. 17-августта кардиологдор менен бирге Сатыбалдиевге кирип чыкканбыз. Кийин кардиологдордун анын ден соолугунда коркунуч бар экенин көрсөткөн корутундусун, жактоочу жана жакындарынын кайрылуусун кошуп ооруканага чыгаруу боюнча УКМКга кат жибергенбиз. УКМК биздин өтүнүчтү аткаруудан баш тарткан катын жиберди. Анда өздөрүнүн дарыгерлери карап жаткандыктан ооруканага чыгарууга азырынча зарылчылык жоктугу менен түшүндүрүшкөн", - деди Сулайманов.

Буга чейин Акыйкатчы институту да анын ден соолугуна тынчсызданып, дарыгерлердин кароосунан өтүүсү керектигин эскерткен.

Сатыбалдиев 18-июнда Бишкек шаарындагы ЖЭБди модернизациялоодогу коррупция фактысы боюнча шектүү катары кармалып, УКМКнын тергөө абагына киргизилген. 20-июнда Биринчи Май райондук соту Жантөрө Сатыбалдиевди тергөө бүткөнгө чейин абакта калтыруу чечимин чыгарган. 8-августта камакта калуу мөөнөтүн 2 айга узарткан.